धोंडो केशव कर्वे!ध्रु.
खडबडीत जरी नाव तयांचे
काटक असती ते मुलुखाचे
उदाहरण ठेवती कृतीचे
खणखणीत वच बरवे!१
महिलांना आधार वाटला
पाठीराखा तया भेटला
ज्ञानदान सोहळा रंगला
अन्याय न मुळि सहवे!२
कुणी शिक्षिका पर्यवेक्षिका
कोणी डॉक्टर, रुग्णसेविका
अण्णांच्या लडिवाळ बालिका
स्मृतिसुमना वेचावे!३
कोणी गाती करती भाषण
कोणी करती चिंतन लेखन
कर्तृत्वाने उजळे जीवन
मोल कुणाला करवे!४
चालायाचे चरणा ठावे
सोसायाचे शरिरा ठावे
तत्त्वावरती ठाम रहावे
महर्षिपद वंदावे । ५
रचयिता : श्रीराम बाळकृष्ण आठवले
२८ नोव्हेंबर २००२
गुरुवार, सायं ५.२०
