संसार म्हणजे परमार्थाची प्रयोगशाळा

परमार्थाची प्रयोगशाळा आहे संसार
आग्रह घडवी येथे वटवट शांत सदाचार!ध्रु.

वाणीतुन प्रकटते साधना का मग भांडावे?
अपशब्दांनी का कोणाच्या मनास दुखवावे?
सहन करी जो शिवानुयायी अंती ठरणार!१

कुणि न सांगता कामे सारी झटपट उरकावी
टापटीप ती तैशी आस्था जनां कळो यावी
घर हे मंदिर गमते जेथे अभंग म्हणणार!२

दुसऱ्याचे सुख ते माझे सुख अनुभवि हे जाणे
सात्त्विक आहाराची गोडी सत्त्वस्थच जाणे
गीताजीवन जगता यावे साधक बघणार!३

योगायोगे येथे जमलो पुढचे ना कळते
जे ते भेटे हरिरूप ते का न मना कळते?
नामी रंगे राम तयाचा शिक्षक होणार!४

नरनारी आबालवृद्ध ही सगळी श्रीराम
प्रत्येकच घर ठरे अयोध्या भाव जनी ठाम
आपुलकीचे रेशिमधागे शाली विणणार!५

रचयिता : श्रीराम बाळकृष्ण आठवले
२२.६.१९९५