हरीला भक्तीने बोलवा

ऑडिओ - हरीला भक्तीने बोलवा

हरीला भक्तीने बोलवा
मनाला सत्कर्मी रंगवा!ध्रु.

एक एक गुण मिळता घेता
दुर्गुण तैसा निघून जाता
जीवना अर्थ लाभतो नवा!१

स्वार्थाधिष्ठित नाती गोती
हरिविण दुसरा कुणी न जगती
जिभेला नामामृत चाखवा!२

श्री नारायण जय नारायण 
भागवताचे कर पारायण
याविण छंद न दुसरा हवा!३

जितकी भक्ती तितकी प्राप्ती
भाग्यच समजा विषयि विरक्ती
नारदा सन्माने आणवा!४

वेदनाच जर वाढत गेली
करा कल्पना वाजत मुरली
देहही बदलायाला हवा!५

सुखदुःखातहि संधि साधतो
नामाविण क्षण जाउ न देतो
भक्त तो भगवंताला हवा!६

सदाचार सवयीचा होता
श्रीकृष्णासम लाभे नेता
अर्जुना पार्थसारथी हवा!७

रचयिता : श्रीराम बाळकृष्ण आठवले
१९९६