जनांस सांगे प्रल्हाद..

जनांस सांगे प्रल्हाद
घ्या देवाचा आल्हाद!ध्रु.

उठता बसता, जाता येता
नाम स्मरता सरती चिंता
साद तसा ये प्रतिसाद!१

नारायण विश्वात कोंदला
नकळत अंतःकरणी भरला
सुटे न भजनाचा नाद!२

प्रपंचात या का गुंतावे?
उगा जगाशी का भांडावे?
मनास वळवा तुम्ही आत!३

मन जर रमले नामात
इंद्रिय गण ये ताब्यात
आगळाच हा आनंद!४

मीच मला जर ओळखले
नारायण सगळे कळले
तत्त्व यावया ध्यानात!५

रचयिता : श्रीराम बाळकृष्ण आठवले