गीताई अंगाई गाते

कुशीत घेते हळु थोपटते गीताई अंगाई गाते
कृष्ण कृष्ण म्हणताना आपण पार्थ नि माधव ऐसे वाटे!ध्रु.

शोकाचे काही ना कारण दुःख उरावर कशास घ्यावे?
आपण करतो असे न काही कर्तेपण का शिरी धरावे?
जे ज्याचे त्या करता अर्पण कृष्णबासरी कानी येते!१

जन्मे वाढे झिजते काया मातीमध्ये मिसळुन जाते
रडायचे ना झुरायचे ना आत्म्याशी तर अपुले नाते
तो मी ती मी सोपी शिकवण श्रीगीताई  देत राहते!२

कर्तव्याला आचरिताना नाम मुखातुन झरत राहावे
कर्मे घडती झरझर सुंदर जनार्दनाने प्रसन्न व्हावे
योग वेगळा मुळीच नसतो गीताई ही शिकवण देते!३

खचायचे ना अडायचे ना ध्यान पुरवते अनंत शक्ती
अभ्यासाने भक्तिपथावर भक्तांची नित होते प्रगती
तू माझा मी तुझीच आई असा दिलासा गीता देते!४

कृष्णचरित गीतेतच भरले रहस्य सांगे गीतामाई
विचारवंता संयत भक्ता कृष्ण निरंतर भेटत राही
सदा सर्वदा वाचा गीता, गा गीता प्रेरणा लाभते!५

रचयिता : श्रीराम बाळकृष्ण आठवले
९.१०.२०००