घराला मंदिरपण यावे!

 

स्वप्न हे आकारा यावे
घराला मंदिरपण यावे!ध्रु.

इथे तिथे गोपाळ दिसावा
अंतरातला कृष्ण हसावा
मानस उजळावे!१

भेटीलागी ओढ असू दे
संवादाची रुचि असू दे
साधक जन व्हावे!२

बहिरंगाला महत्त्व नाही
अंतरंगि श्रीरंगच येई
अंतर्मुख व्हावे!३

उपासनेने पालट होतो
विकार विरतो विचार सुचतो
शहाणपण यावे!४

बहुतांची अंतरे राखता
तनास तृप्ती मना शांतता
अनुभवास यावे!५

रचयिता : श्रीराम बाळकृष्ण आठवले
जून १९८३