बाळ जन्मले!

आशीर्वच सद्गुरुचे सत्य जाहले
बाळ जन्मले! बाळ जन्मले!ध्रु.

ईश्वरीय थोर दया
पातली रहावया
विष्णुपंत गहिवरले! भाग्य उदेले!१

मी माझे मावळता 
तू तुझे उगवता
विरक्तिगंध  धुंद तेथ मुक्त दरवळे!२

निर्मला सुकोमला
माउली सुमंगला
अमोल लाभ जाहला, हास्य उमलले!३

सोऽहं स्वर लागला
ज्ञानवृक्ष बहरला
मोदफळे लहडली, विश्व विनटले!४

शारदीय ज्ञानदीप 
तेवतसे अति समीप
तिमिर मावळे क्षणात सदन उजळले!५

गृहि येता नारायण
पावस हो अति पावन
विष्णु रुक्मिणी कृतार्थ जगति जाहले!६

विष्णुपंत अति भाविक
मितभाषी मृदु वचनिक
नामनिष्ठ महातपी भरुनि पावले!७

रचयिता : श्रीराम बाळकृष्ण आठवले