नित्य नवी गीता सांगे पार्थसारथी!

सूत्र दिले हरिच्या हाती
नित्य नवी गीता सांगे पार्थसारथी!ध्रु.

पार्थ होउनी मी जेव्हा कृष्णशरण व्हावे
ज्ञान आतुनी उमलावे, मने शांत व्हावे
कृती कृती नकळत घडवी हरि सत्कृती!१

कधी तरी जाई काया खिन्न काय व्हावे?
गुप्त परि आहे आत्मा आत्मरूप ध्यावे
'तोच तोच तू परमात्मा' देत जागृती!२

तुझे कार्य आहे धर्म प्राण पणा लाव
हीच हीच ईश्वरपूजा ओत भक्तिभाव
यज्ञचक्र अविरत फिरण्या कृष्ण दे गती!३

मार्गदर्शनाच्यासाठी पहा आत आत
अंतरात रंगे कृष्ण तोच देइ हात
मने मने सुमने करते कृष्णसंगती!४

सुखदुःखा कारण कर्म कशाला अहंता?
भाविकास हरि दे भाव, नको करू चिंता
गुणातीत तुज व्हायाचे वाट चाल ती!५

तोल मनाचा जो राखे, तया नाव संत
बगीच्यात त्याच्या फुलला सदाचा वसंत
असा होइ योगी सांगे रुक्मिणीपती!६

रचयिता : श्रीराम बाळकृष्ण आठवले
१७.१२.१९८७