महाराजा, महाराजा, स्वीकारा अमुची पूजा!ध्रु.
रूप देखणे, मधुर हासणे
हंसासम डौलात चालणे
हृदया भिडती अपुली वचने, साधेपण दे साजा!
शुचिता करते निवास येथे
भगवंताचा सुगंध येथे
वेदांता ये रंजकता हो वैराग्याच्या राजा!
अंतरंग उतरले भाषणी
मातृप्रेमा विलसे नयनी
अपुली वाणी नित नामार्पित लोकांच्या ये काजा!
जना पाहिले, जना जाणले
दीनदुःखिता हृदयी धरले
परमार्थामधि पुढे ढकलले तरि ना गाजावाजा!
गुरुराया तुम्हि , तुम्ही माउली
प्रपंचतप्ता शीत साउली
प्रपंच जोडुनि परमार्थाशी अनुभव दिधला ताजा!
रचयिता : श्रीराम बाळकृष्ण आठवले
(ब्रह्मचैतन्य गोंदवलेकर महाराजांच्या चरित्रावर आधारित काव्यामधील हे एक काव्य)
No comments:
Post a Comment