मी नृपकन्या नाम रुक्मिणी
वरिले श्रीकृष्णाला! ध्रु.
बाह्यस्फूर्ती ती मावळली
अंत:करणी मूर्ती ठसली
निशिदिनि चाले श्रीहरिचिंतन
दुजा न ध्यास मनाला! १
कानी आली निर्मळ कीर्ती
विषयसुखाची मला न गणती
गोविंदच मम आत्मा आहे
छंद तयाचा जडला! २
तनामनाने हरिमय झाले
मी नच माझी आता उरले
नको श्रीहरि करू उपेक्षा
स्वीकारी रे मजला! ३
केवळ पति नच तू उद्धर्ता
तू असशी मायेच्या परता
जीव वाहिला तुझिया चरणी
भाव न ध्यानी आला? ४
रचयिता : श्रीराम बाळकृष्ण आठवले
०६.१२.१९८९
No comments:
Post a Comment