Wednesday, May 6, 2020

यावे नृसिंह होऊन..

अगा नारायणा यावे नृसिंह होऊन
तुझ्या दर्शना आतुर झाले असंख्य लोचन!ध्रु.

स्तंभ कडाडत, यावे गर्जत लक्ष्मीच्या रमणा
धडकी भरवित रिपूच्या मनी या या मधुसूदना
अभयदान द्यावे प्रल्हादापरि जे भक्तजन!१

वटारलेले डोळे आणखी विस्कटली आयाळ
लवथवणारी जिव्हा करते दैत्याला घायाळ
दुष्टांचे कर निर्दालन तू भक्तांचे रक्षण!२

शरणागत ते स्वस्थ तयांचा घेशी तू भार
नारायण नारायण म्हणता त्यांचा उद्धार
कधी संहारक कधी आश्वासक व्हावे आपण!३

हिरण्यकश्यपु दैत्य मारिला अंकी घेउनिया
कृपाच केली उभ्या जगावर अद्भुत ही किमया
आग जाहली नखे सह्य ती उंबरी रोवुन!४

उग्र रूप ते अत्यावश्यक धर्मा रक्षाया
निर्दालन जे दैत्यांचे ती असते खरी दया
पाठ शिकविला प्रल्हादाची पाठ राखून!५

रचयिता : श्रीराम बाळकृष्ण आठवले

No comments:

Post a Comment