मुरारबाजी देशपांडा

हा क्रोध आत मावेना, अपयश जिवा सोसेना
उडविणे शत्रुचा फन्ना, मांडणे रिपूची दैना
आवेशे जणु कोसळला तो सह्याद्रीचा कडा
मुरारबाजी देशपांडा!१

खडाखड उडवि खांडोळी, मस्तके धडावेगळी
अंगार शत्रुला जाळी, खेळते नृत्य महाकाली
सर दरवाजावरी फुरफुरे डौले भगवा झेंडा
मुरारबाजी देशपांडा!२

चौदाशे हात उठलेले, रुद्राचे तांडव चाले
किति पठाण हे गडगडले, मावळी रक्त सळसळले
निर्वाणीचा खेळ मांडला मुरार गर्जे लढा
मुरारबाजी देशपांडा!३

छावणीत वैऱ्याच्या घुसे, हे दुधारी पाते जसे
जीव वसूल हे करतसे, दृष्टी ना मुळी ठरतसे
दारूचा भडका फिका ज्यापुढे असा वीर फाकडा
मुरारबाजी देशपांडा!४

जंग काहीवेळ थांबवुन, काही बोले दिलेरखान
निष्ठेचा घोर अपमान, बाजी झाला पुरा बेभान
खानाचं मुंडकं हीच बक्षिसी, दात खाई कडकडा
मुरारबाजी देशपांडा!५

औलाद प्रभूंची अमुची, बेइमान ना व्हायाची
बेफाम झुंज द्यायाची, बेहाय धडक द्यायाची
भूक भडकली तलवारीची रणि झडला चौघडा
मुरारबाजी देशपांडा!६

"मी शिवाजीराजाचा शिपाई, तुझा कौल घेत मी नाही"
खाने बाण सोडला लवलाही, वीराचा कंठवेध घेई
मुरारबाजी पडला गातसे शाहिर पोवाडा
मुरारबाजी देशपांडा!७

रचयिता : श्रीराम बाळकृष्ण आठवले