विनायक जन्माला आला..

साधली शुभ मंगल वेला, विनायक जन्माला आला
विनायक जन्माला आला!ध्रु.

घर गजबजले, नटले थटले
बालब्रह्म गालात हासले
सुवर्णचंपक कांति मुलाची, वासंतिक वेला!१

यदुराणा जणु जन्म घेतसे
आस्तिक्याची खूण पटतसे
कृतार्थ माता पितरे दोन्ही शुभ प्रत्यय दिसला!२

सफल मनीषा फुलली आशा
भाव बोलके मूकच भाषा
कैवल्याचा ठेवा अलगद करी कसा आला? ३

भाल भव्य अन् सतेज डोळे
इवली जिवणी ओठ कोवळे
सुस्वरूप हा पुत्र जननिने पुनःपुन्हा चुंबिला!४

किती प्रतीक्षा याची केली
हाक प्रभूने जणू ऐकली
रोमांचांनी तनू बहरली गात मधुर कोकिळा!५

दृष्ट न लागो यास कुणाची
अशी भावना त्या जननीची
गालबोट परि अधिकच खुलवी गौर गौर गाला!६

तेज पित्याचे रूप आईचे
निधान झाले वात्सल्याचे
बाल विनायक त्या सदनांतरि कुलभूषण झाला!७

रचयिता : श्रीराम बाळकृष्ण आठवले