स्वराज्यातला सरसेनानी
विकारवश होताच त्याक्षणी
न्यायनिष्ठ राजास सोडुनी
हराम मी झालो
खरोखर सर्वस्वा मुकलो!
विकारवश होताच त्याक्षणी
न्यायनिष्ठ राजास सोडुनी
हराम मी झालो
खरोखर सर्वस्वा मुकलो!
कुठुन आठवे मला अवदसा
पापाचा घेतला मी वसा
गनिमाच्या लष्करात शिरूनी
गुलाम मी बनलो
खरोखर सर्वस्वा मुकलो!
आता केवळ मरणयातना
जगण्याची, मज नुरे वासना
अनंत मरणे आधी मरूनी
स्वजनद्रोही ठरलो
खरोखर सर्वस्वा मुकलो!
घडेल कैशी इथुन मुक्तता
धर्मांतर मज एकच त्राता
पापक्षालनासाठि आज मी
धर्मा आंचविलो
खरोखर सर्वस्वा मुकलो!
काल लक्ष्मण, आज बिभीषण
नियती खेळे मजशी भीषण
वाल्या कोळ्यापरी आज मी
पापपंकि रुतलो
खरोखर सर्वस्वा मुकलो!
चुकलों मी कर्तव्यपालनी
दण्ड परी भोगण्यावाचुनी
व्यक्तीसाठी राष्ट्रहिताचा
घातक मी ठरलो
खरोखर सर्वस्वा मुकलो!
रचयिता : श्रीराम बाळकृष्ण आठवले
No comments:
Post a Comment