करु या पूजन श्रीनवनाथांचे..

चला सयांनो, करु या पूजन श्रीनवनाथांचे!

पूजन करता उजळत तनमन भाग्य भाविकांचे!ध्रु. 

भक्तीमध्ये जरा न थारा असतो शंकेला

स्थलकालांच्या सीमा लंघुन साधक गेलेला

अंगी येते हत्तीचे बळ लढत राहण्याचे!१

सृष्टिचक्र गति चमत्कार हा मोठ्याहुन मोठा

काळ जखम करि, घाली फुंकर कठोर का म्हणता

महाकाल जो आदिनाथ त्या नमन करायाचे!२

वाचत जाऊ समजुन घेऊ हातातिल पोथी

समजुन घेऊ सांगत जाऊ नाथांच्या गोष्टी

पसाऱ्यातले सार तेवढे वेचुन घेण्याचे!३

फुले शुभ्र वसनेही शुभ्रच रहस्य जाणावे

प्राणांचेही मोल देउनी शीला रक्षावे

ध्याना बसता पळून जाते भय कलिकाळाचे!४

ललित कथांचे, गीतांचे वा रूप बघा देउन

संवादाची रुची आगळी नाट्य बघा लिहुन

सुधासागरी आनंदाने तरत राहायाचे!५

रचयिता : श्रीराम बाळकृष्ण आठवले 

१९.४.२००१

वरुथिनी एकादशी