तू देह नव्हेसी जीवा

तू देह नव्हेसी जीवा,
घे ध्यानी घे राजीवा!ध्रु.

परब्रह्म तू, आनंदचि तू
बंधनि गुंतसि कशासाठि तू?
स्वरूप ओळख तुझे मूळचे
भिऊ नकोसी भवा!१

देहोऽहं संकल्प बाधला
दुःखाचा कोसळला घाला
सोऽहं सोऽहं म्हणता म्हणता
मिळशिल जाउनि शिवा!२

झटकुनि टाकी भ्रम देहोऽहम्
ध्यास धरी रे सोऽहं, सोऽहं
अविनाशी, आनंदरूप तू 
जाणशील केधवां?३

रचयिता : श्रीराम बाळकृष्ण आठवले
१३.०२.१९७४

(जैसा किडाळाचा दोषु जाये
तरी पंधरे तेचि होये
तैसे जीवा ब्रह्मत्व आहे
संकल्प लोपी

ज्ञानेश्वरीतील या ओवीवर आणि स्वामी माधवनाथांच्या ज्ञानेश्वरी ज्ञानकिरणे या पुस्तकातील प्रवचन क्रमांक ५२ वर आधारित काव्य.)