आत बाहेर तोच ईश्वर!

आत बाहेर तोच ईश्वर!ध्रु.

सर्व भूतांत, सर्व स्थानांत
सर्व कालात, सर्व दिशांत
ज्याचा वावर, तोच ईश्वर!१

लपुनि राहतो, दृष्टी न पडतो
साक्षित्वे पाहतो, कुठे हा दडतो?
शोधिता अंतर, सापडे ईश्वर!२

कोण मी जाणता, कोण मी शोधता
कोण मी पुसता, कोण मी कळता
येती उद्गार, मीच ईश्वर!३

आसन ढळेना, समाधि भंगेना
अज्ञान छळेना, आनंद मावेना
भूती साकार दिसतो ईश्वर!४

रचना : श्रीराम बाळकृष्ण आठवले
२५.०३.१९७४

(ऐसेनि जे निजज्ञानी खेळत सुखे त्रिभुवनी
जगद्रूपा मनी साठऊनी माते
जे जे भेटे भूत ते ते मानिजे भगवंत
हा भक्तियोगु निश्चित
जाण माझा

वरील ज्ञानेश्वरीतील ओव्यांवर आणि स्वामी माधवनाथांच्या ज्ञानेश्वरी ज्ञानकिरणे या पुस्तकातील प्रवचन क्रमांक ९२ वर आधारित काव्य )