रमावे भगवंताच्या ध्यानी!

बसुनिया रम्य शांतशा स्थानी
रमावे भगवंताच्या ध्यानी!ध्रु.

आदरपूर्वक सद्गुरु स्मरता
सारे सात्त्विक भाव उमलता
कोवळीक ये मनी!१

विषयांचा मग नुरेल आठव
यास्तव भगवत्प्रेमा जागव
जाइल अहंभाव विरुनी!२

मुद्दलात हे मनची गेले
स्वरूप ठायी केवळ उरले
सुखद त्या सोऽहंच्या चिंतनी!३

रचयिता : श्रीराम बाळकृष्ण आठवले
१५.०२.१९७४

(जेथ स्मरतेनि आदरे
सबाह्य सात्त्विके भरे
जव काठिण्य विरे
अहंभावाचे
विषयांचा विसरु पडे
इंद्रियांची कसमस मोडे
मनाची घडी घडे
हृदयामाजी

या ज्ञानेश्वरीतील ओव्यांवर आणि स्वामी माधवनाथांच्या ज्ञानेश्वरी ज्ञानकिरणे या पुस्तकातील प्रवचन क्रमांक ५४ वर आधारित काव्य).