माया भगवंताची छाया..

माया भगवंताची छाया 
का घाबरशी वाया?ध्रु.

रामनाम प्रेमाने घेणे 
तरीच मायेमधुनी सुटणे 
आळवि रे प्रभुराया!१ 

भगवंतावर तिची न सत्ता 
रामाची आगळी महत्ता 
प्रभुच्या आधिन माया!२ 

अवघी दुनिया आहे माया 
श्रीरामाची आहे छाया 
स्मर प्रभुनाम तराया!३

रचयिता : श्रीराम बाळकृष्ण आठवले.

गोंदवलेकर महाराज यांची प्रवचने मधील प्रवचन क्रमांक ४२ (११ फेब्रुवारी) वर आधारित काव्य.

मायेला बाजूला सारून भगवंतापर्यंत कसे पोहोचायचे? माया ही भगवंताच्या सावली सारखी आहे. या प्रश्नाचे उत्तर एकच, भगवंताचे नाव घेणे. जसे व्यक्तीशिवाय सावलीला अस्तित्व नाही, तसे मायेला स्वतंत्र अस्तित्व नाही, तसेच तिला स्वतंत्र शक्तीही नाही. मायेची सत्ता भगवंतावर नाही. माया भगवंताच्या आधीन आहे. सर्व विश्व हे मायारूप आहे; म्हणजे ती परमेश्वराची छाया आहे. याचा अर्थ या विश्वाला आधार परमेश्वरच आहे. आता या मायेच्या तावडीतून सुटून परमेश्वराकडे कसे जायचे? भगवंताचे नाव, म्हणजे भगवंताच्या सहीचे पत्र, जर आपण घेऊन गेलो तर मायारूपी रखवालदार ती सही पाहून आपल्याला आत सोडील व भगवंताची भेट होईल. म्हणून माया तरून जाण्यास भगवंताचे नामस्मरण हाच रामबाण उपाय आहे.