नाम घ्यावे, नाम गावे, आनंदासाठी

नाम घ्यावे, नाम गावे, आनंदासाठी!ध्रु.

निष्ठेने जो नाम घेतसे
उद्दिष्टाते तो गाठतसे
अगाध महिमा नामाचा त्या संत सांगताती!१

उगमच नामी मोदाचा
वासच नामी मोदाचा
नित्य दिवाळी त्याला ज्याची नामि रमे वृत्ती!२

अनन्य देवासी व्हावे
नामी मीपण ओतावे
आनंदी आनंद वितरते नामाची संगती!३

रचयिता : श्रीराम बाळकृष्ण आठवले

गोंदवलेकर महाराज यांची प्रवचने मधील प्रवचन क्रमांक ४५ (१४ फेब्रुवारी) वर आधारित काव्य.

पारंपारिक प्रगतीच्या मार्गात प्रत्येक व्यक्तीतील ज्या गुणदोषांमुळे अडथळा येतो ते गुणदोष दूर करून प्रगतीचा मार्ग भगवंताचे नाम मोकळा करते. म्हणून कोणात कोणतेही गुणदोष असोत, त्याने निष्ठेने नाम घेतले की त्याचे बिनचूक काम होऊन तो ध्येय गाठतो, ज्याला आनंदरूपी नंदादीप हवा असेल त्याने सतत नामरूपी तेलाचा पुरवठा करीत राहिले पाहिजे. थोडक्यात म्हणजे ज्याला आनंद हवा असेल, त्यांनी सतत नाम घेतले पाहिजे. आनंदाचा उगमच नामात आहे. येईल त्या परिस्थितीमध्ये आपण आनंद निर्माण करावा. रोज अगदी पाच मिनिटे का होईना, भगवंताशी अनन्य व्हायला शिका. जगण्यामध्ये आनंद आहे ही गोष्ट खरी, म्हणून ज्यांना जगायचे आहे त्याने नाम घ्यावे. जिथे भगवंत तेथे आनंदी आनंद असतो. आनंद रोख दुःख उधार अशी वृत्ती ठेवावी. ज्याचा आनंद नामात टिकेल त्याला नित्य दिवाळीच आहे.