श्रीराम म्हणा श्रीकृष्ण म्हणा

॥ श्रीगजानन प्रसन्न ।।

श्रीराम म्हणा जयराम म्हणा जय जय जय जय राम म्हणा
श्रीकृष्ण म्हणा जयकृष्ण म्ह‌णा जय जय जय जय कृष्ण म्हणा!ध्रु.

गाता गाता सापडेल स्वर 
प्रसन्न दर्शन देइल शंकर 
भैरव वा केदार कधी कुणि मल्हारहि तो आळवा ना!१

निराशेतुनी उमले आशा 
आरंभच अशिवाच्या नाशा
आशावादी असतो आस्तिक सदा सिद्ध तो हरिभजना!२

शिवलीलामृत वाचत जावे
हरिविजयी वा मन रमवावे 
ओवी अथवा अभंगवाणी संतांच्या पाऊलखुणा!३ 

देह भले हा राहो जावो 
हरिचरणी मन सुस्थिर होवो 
गाय न सोडी पाठ हरीची रसग्रहण हे रुचो मना!४

ज्ञाना एका नामा तुकया 
रामदास बरवाच स्मराया
नाम जिभेवर, प्रेम पोटभर उरू न देते उणेपणा!५ 

एकांताच्याही एकांती 
गुरुशिष्यांच्या घडती भेटी
समाधान ये माहेराला, फुले मोगरा क्षणक्षणा!६

साध्य नि साधन नामच आहे
दास नि राघव नामच आहे  
स्वरूपीच श्रीराम विसावे गती अन्य त्या उरेचि ना!७

रचयिता : श्रीराम बाळकृष्ण आठवले 
१८.०३.१९९७