स्वामींनी तुज नाम दिले

स्वामींनी तुज नाम दिले 
ॐ राम कृष्ण हरि! ॐ राम कृष्ण हरि!
नाम सदा हे गात रहा 
ॐ राम कृष्ण हरि ! ॐ राम कृष्ण हरि!ध्रु.

गाता गाता वाढू दे लय 
वाढू दे लय बाणो निश्चय
आत्मारामच कैवारी!१ 

इथे कुणाचे भय कोणाला? 
इथे कुणाचा द्वेष कुणाला? 
सोऽहं हा दृढभाव धरी!२

निजधामाला स्वामी गेले 
नाम होऊनी अंतरि आले 
पूजेचा क्षण साध तरी!३

पावसची ही ज्ञानमाउली 
सर्वांच्या शिरि धरी सावली 
वरप्रार्थना ध्यानि धरी!४

अभंग ज्ञानेश्वरी वाच तू 
हरिपाठांतरि जा रंगुनि तू
अमृतधारा झेल शिरी!५

कण कण नामाने भारू दे
नामरसायन तनी भिनू दे 
कायापालट होय तरी!६

सात अंतरे सप्तपदी ही
वज्रकवच तू चढवुन घेई
श्रीगुरुरक्षा हीच खरी!७

रचयिता : श्रीराम बाळकृष्ण आठवले
१७.०१.१९९४
[श्री स्वामींच्या (स्वामी स्वरूपानंद, पावस) खोलीतून बाहेर आल्यावर]