नामाची मनाशी संगत जोडावी!

नामाची मनाशी संगत जोडावी!ध्रु.

"माझे माझे" सोडावे 
भजनानंदी डोलावे 
"मी रामाचा" अशी भावना - अंगी बाणावी!१ 

कर्तव्यासी चुकू नये 
हाव ऐहिकी धरू नये 
नामस्मरणे तीर्थयोग्यता तनुलागी यावी!२ 

जाणुनिया वृत्ती 
संत जसे सांगती 
तनु गुरुकार्यी तुलसीदलसम मोदे अर्पावी!३ 

रचयिता : श्रीराम बाळकृष्ण आठवले 

गोंदवलेकर महाराज यांची प्रवचने मधील प्रवचन क्रमांक ४७ (१६ फेब्रुवारी) वर आधारित काव्य.

ज्या स्थितीत परमात्मा ठेवतो त्यात आनंद मानावा. मिळण्याची व मिळवण्याची हाव वाढल्यामुळे आपल्याला खरे दुःख होते. आपण जगात वागताना सर्व माझे माझे म्हणतो पण प्रत्यक्ष आपल्या वाटणीस किती येते याचा कधी आपण विचार करतो का? भगवंताकडे चित्त गुंतवून ठेवणे हाच खरा धर्म मानावा. नामात जो राहिला सो सत्संगतीत राहिला. मनाची व नामाची संगत जोडून द्यावी. आपण भगवंताच्या आधाराने रहावे. नेहमी लीनता ठेवावी. भगवंतांना ज्या रीतीने समाधान होईल त्याप्रमाणे आपण वागावे. संत ज्याची त्याची वृत्ति ओळखून मार्ग सांगतात. आपण फक्त संत आपल्याला सांगतील त्याप्रमाणे वागावे.