घडत ना प्रत्यक्षच दर्शन!

दिवसांमागुनि दिवस लोटती व्यर्थ गमे जीवन 
घडत ना प्रत्यक्षच दर्शन!ध्रु.

अश्रूसरिता वाहु लागते 
हृदिची तळमळ ना आवरते
विरह व्याकुळ मम चित्ताचे कसे करू सांत्वन?१ 

रूप अलौकिक दिसु दे डोळा 
ध्यास जिवा लागला लागला 
स्वास्थ्य न लाभे तिळभर चित्ता का न गळे मीपण?२  

दुर्बळ शरीर होउनि बसलो
प्राप्तिसाधना वाटे मुकलो
खंत हीच जाळते निशिदिनी जलावीण मीन!३

ही बेचैनी साहू कैशी 
धावत येई हे हृषिकेशी 
मी ऐकियले रडत्या वत्सा माय घेत उचलुन!४ 

अनेक भक्तांसाठी शिणला
माझा का नच तुला कळवळा
सत्यस्थिति मी माझी केली तुज‌ला निवेदन!५ 

एकदाच दे हरी दर्शना 
लोटांगण घालू दे चरणा
सुहास्यवदना दयाघना मी कधी तुला पाहिन?६

मला न कसली दुसरी आशा 
तुला पाहता मूकच भाषा
पुरव पुरव रे माझी मनिषा त्वत्पादे मी लीन!७

रचयिता : श्रीराम बाळकृष्ण आठवले
(स्वामी स्वरूपानंदांच्या जीवनावर आधारित काव्य)