रेडा वेद बोलला

काय वानु नवलाई समदी
चिमक्तार झाला
सन्याश्याच्या पोरे शिवता
रेडा वेद बोलला!ध्रु.

पंडित पडले पाया
बघती पोरे आया बाया
लाजलाजले पोर कोवळे करुणा देवाला!१

डोळ्यांमधुनी नद्या वाहती
धन्य धन्य सगळेजण म्हणती
काय कथा अम्हा गरिबांची, ब्रह्मवृंद लोळला!२

ज्यांनी दिधल्या शिव्या
त्यांनी म्हटल्या वव्या
अद्भुत करणी ही देवाची कळे न कोणाला!३

कसले पंडित कसले शास्त्री
अमुच्या भारे शिणे धरित्री
कोण आम्ही पावन करणारे म्हणति मुक्त जाहला!४

रचयिता : श्रीराम बाळकृष्ण आठवले