सुखसंवादच गीता!

सुखसंवादच गीता! सुखसंवादच गीता!ध्रु.

विचार ओघाने आलेले
भावनेमुळे झाले ओले
पाठीवर कर फिरवी जणु की
प्रेमळ वत्सल माता!१

गुरुशिष्यांची जोडी जमली
तत्त्वचिंतनी रतली रमली
मंथन झाले जगावेगळे
नवनीत जणू कविता!२

स्वगत मनोहर वर्णन सुंदर
स्वभावरेखा मधुर मधुरतर
शब्दचित्र हे नादचित्र हे
साहित्यिक कोमलता!३

व्यक्ती व्यक्ती विकसित व्हावी
अवघी सृष्टी हळु उमलावी
विश्वकमल हलके उमलावे
बघता माधवसविता!४

चित्तशुद्धिसी मधुर रसायन
श्रीगीतेचे सुस्वर गायन
कायापालट घडवी नकळत
प्रबोधिनी श्रीगीता!५

रचयिता : श्रीराम बाळकृष्ण आठवले
९.६.१९७६