रामाचे स्मरण देते नित्य समाधान!

रामाचे स्मरण देते नित्य समाधान!ध्रु.

मुखी रामनाम 
करू हाति काम
वासनेचा फास तुटण्या करू नामगान!१

रामी अनुराग 
प्रपंची विराग 
खरी पोथी कळली त्याच्या जीवनात राम!२ 

झडो देहबुद्धी
लागु दे समाधी
शरण गुरुसि सत्वर जाता करी येत ज्ञान!३

रचयिता : श्रीराम बाळकृष्ण आठवले

गोंदवलेकर महाराज यांची प्रवचने मधील प्रवचन क्रमांक २१७ (४ ऑगस्ट) वर आधारित काव्य.

भगवंताचे होणे हे माझे या जन्मातील मुख्य काम आहे असे समजावे. रात्रंदिवस मी भगवंताचा कसा होईन याचा सारखा विचार करावा. आपली वासना कोठे गुंतते हे पहावे. विचार आणि नाम यांनी वासनेला खात्रीने जिंकता येईल. मग आपले कर्तेपण आपोआप मरून जाईल. वासना सूक्ष्म व लवचिक आहे पण आपण तिला देहबुद्धीने अगदी घट्ट बनवून टाकतो, मग ती काढणे फार कठीण जाते. विषयांची वासना सर्व नाहीशी झाल्यावर जी उरते ती भगवंताची वासना होय. पोथी ऐकून प्रपंचाविषयी ज्याला वैराग्य आले त्यालाच पोथी खरी कळली असे म्हणावे. पोथीत सांगितलेले ऐकून जो ते आचरणात आणतो तोच खरा श्रोता होय.