स्वराज्य व्हावे या भूमीवर

स्वराज्य व्हावे या भूमीवर मायलेक वांछिती
जय भवानी जय भवानी मंत्र हाच जपती!ध्रु.

लेखन वाचन शिकला शिवबा रामकथा ऐकली
चौकस जागृत बाल शिवाने दु:स्थिती न्याहाळिली
पराक्रमाते उत्सुक बाहू स्फुरण पावताती!१

पंतांसंगे बसुनी शिवबा न्यायदान पाहतो
मौक्तिक चारा राजहंस हा वेचुनिया घेतो
श्रद्धेने घे चिमणा शिवबा संतांच्या भेटी!२

भग्न मंदिरे, जळकी सदने पदोपदी दिसता
त्वेषे येतो फुलून शिवबा ओठा आवळता
या दैन्याते पूर्ण निपटणे ठरवी शुद्धमती!३

सत्संगाने, नामजपाने पावनता येते
बलोपासना पुण्याचरणा शक्ती निरवीते
संस्कारांनी अशा शुभंकर घडते शिवमूर्ती!४

जास्वंदीच्या फुलासारखे चित्त फुलू लागले
मातु:श्रींना बालवयांतरि पक्षिराज दिसले
शिवहृदयांतरि पूर्ण बिंबली मातृपितृभक्ती!५

अपमानाची हवि भरपाई वन्हि चेतवावा
युद्धाभ्यासावाचुनि कैसा बेत सफल व्हावा
चाणक्याची राजनीति मग दोघे अभ्यासिती!६

जगज्जननि अंतरी हासते उठतो पडसाद
जय शिवशंकर जय प्रलयंकर हृदि घुमतो नाद
स्वराज्य व्हावे श्रींची इच्छा पुनः पुन्हा वदती! ७

रचयिता : श्रीराम बाळकृष्ण आठवले