राम म्हणा, कृष्ण म्हणा, म्हणा श्रीहरि

राम म्हणा, कृष्ण म्हणा, म्हणा श्रीहरि
नाम स्मरा, काम करा, ज्ञान ये घरी!ध्रु.

जे घेते वदन नाम, ते न दे शिवी 
जे ओवी गात मधुर त्या न कलि शिवी
उद्यमेच, साहसेच, कुशलता करी!१ 

कर्मि कुशल, जिज्ञासू, दक्ष सदा तो
प्रामाणिक, विनयशील भक्त खरा तो
पार्थसारथी सूत्रे खचित पत्करी!२

समाधान जर चित्ती भाग्य कोणते?
तन्मयता साधनेत स्तुत्य कोणते?
औचित्यच वर्तनात नवल भूवरी!३

गीताई श्रीहरिची बासरी गमे 
अभ्यासी सहजपणे मन सुखे रमे 
जो कृतज्ञ पुण्यवंत योग त्या वरी!४

रचयिता : श्रीराम बाळकृष्ण आठवले
१३.०३.२००५