चिंतन कृष्णजीवनाचे

वसुदेवाचे जीवन होते कर्तव्यासाठी
त्याची पत्नी तत्पर होती उपासनेसाठी 

कंसाचा तर जुलुम वाढला वाडा हो कारा 
पती-पत्नींचा जीवनात मग सुरू कोंडमारा 

घन अंधारी कृष्ण जन्मला किरण प्रकाशाचा
त्या रूपे हुंकार स्फुरला प्रिय स्वातंत्र्याचा 

कृष्ण नव्हे स्वातंत्र्यच होते तो तर परमात्मा 
त्या जपण्या वसुदेव निघाला नंदाच्या धामा 

नंद म्हणा आनंद म्हणा ते निधान सौख्याचे 
माय यशोदा आगर होते ते वात्सल्याचे
 
पापामागुन पाप वाढली हत्यांची रास
कंसाने जणु निमंत्रण दिले अपुल्या मरणास 

गोपाळांनी गोपींनीही कृष्णा प्रेम दिले
दही चोरले दूध चोरले चित्त जिंकलेले

श्रीकृष्णाचे केवळ असणे सत्याचा नारा 
सहकार्याचा गोवर्धन दे जनतेला थारा

देहामध्ये कृष्ण सानुला आत्मा तो आहे 
विकारदैत्या संहारावे - ज्ञान प्रकट आहे

कृष्णजन्म जीवनात ऐसा नित्याचा होई
जो सावध तो विघ्नसागरा सहज तरुन जाई 

निर्भय व्हावे, हसत राहावे सोसावे मोदे 
श्रीकृष्णाचे जीवन ऐसे आतुन उमलू दे 

निराशेतुनी उमले आशा कृष्णजन्म तेथे 
संकटातही हिंमत मोठी कृष्णजन्म तेथे 

अफझलखाना जिथे दंडिले कृष्णजन्म तेथे 
समुद्र लंघुनि जाइ विनायक कृष्णजन्म तेथे 

शिवास दिधले राज्य परत ते कृष्णजन्म तेथे
ग्रामसफाई सुंदर चाले कृष्णजन्म तेथे 

कृष्णजन्म जीवनात मम ही, अशक्य ते नाही 
कृष्ण कृष्ण जय घोष देतसे सत्याची ग्वाही

रचयिता : श्रीराम बाळकृष्ण आठवले