ज्ञानियांचा राजा आळवीत गीता आळवीत गीता धन्य करी आता!

ज्ञानियांचा राजा आळवीत गीता
आळवीत गीता धन्य करी आता!ध्रु.

गोपालाचा वेणु दुजे काय म्हणू?
दुजे काय म्हणू फुले अणुरेणू
राम कृष्ण हरि मंत्र होय गीता!१

ओवी ओवीतुन निनाद प्रसाद
निनाद प्रसाद आमोद आल्हाद
नेवासे मनात वाचकच श्रोता?२

शब्देविण काज सुमनाचा साज
सुमनाचा साज स्वर्गसुखा लाज
कीर्तनास रंग हरिगीत गाता!३

सद्गुरु निवृत्ती अनावर स्फूर्ती
अनावर स्फूर्ती कृपा वर्षताती
आषाढ श्रावण धारानृत्य होता!४

सूरताल यांचा साधलासे मेळ
साधलासे मेळ रंगलासे खेळ
अनाहत नाद श्रुतिपथि येता!५

रचयिता : श्रीराम बाळकृष्ण आठवले
०७.१२.१९८०