अशी साधना हातुनी या घडावी

 ।। श्रीगजानन प्रसन्न।।  

तनी स्वस्थता सर्वदा या असावी
तरी आपली जीभ अंकीत व्हावी 
जरा ऊदरी रिक्तता राहु द्यावी 
अशी साधना हातुनी या घडावी १

नव्हे देह मी भूमिका ठाम व्हावी 
सदा सर्वदा वृत्ति रामी मुरावी 
मना वेदना नामघोषी विरावी 
अशी साधना हातुनी या घडावी २

मना नाम घे तूच आहेस दैवी 
वृथा वावगी काय चिंता वहावी
क्षणाने क्षणा सार्थकी नित्य लावी
अशी साधना हातुनी या घडावी ३

जिथे पोचणे लक्ष तेथेच ठेवी 
विवेके सदा वृत्ति तू आवरावी
जरी जिद्द ती अंगि तू चेतवावी
अशी साधना हातुनी या घडावी ४

मना हो तपस्वी, मना हो मनस्वी 
मना नम्र होई तदा तू सुदैवी 
उभारी अशी अंगि तू आणवावी
अशी साधना हातुनी या घडावी ५

रचयिता : श्रीराम बाळकृष्ण आठवले
१६.०९.१९९६