जय जगदंबे माते। करि करुणा गे माते!

।। जय माताजी ।।

जगदंबा ! सगळ्यांची आई ! भक्ताने तिची मानसपूजा आरंभिली ! "जे जे उत्तम, उदात्त, उन्नत, महन्मधुर ते ते "तिच्याच पदी अर्पिलें-
जगदंबेचे लेकरू म्हणत आहे -

++++++++

जय जगदंबे माते। करि करुणा गे माते!ध्रु.

सुवर्णमंडप सजला इथला
रत्नखचित आसन घे तुजला
आसनस्थ हो, मानसपूजा स्वीकारी माते!१

स्नान घातले उष्ण जलाने 
तुज लेवविली विविध भूषणे
कुंकुमलेपन केले सुंदर स्मितवद‌ने माते!२ 

केस धुपवुनी वेणी घातली 
चंदनचर्चित काया सजली 
छत्र, चामरे, दर्पण तुजला अर्पियली माते!३ 

त्रिभुवनजननी कृपा असू दे 
शिरि मायेचे छत्र असू दे 
नामस्मरणी रात्रंदिन मज रंगू दे माते!४

रचयिता : श्रीराम बाळकृष्ण आठवले
०४.१२.१९७३