राम कर्ता, राम दाता याचसाठी न लगे चिंता!

राम कर्ता, राम दाता
याचसाठी न लगे चिंता!ध्रु.

सतत जपणे रामनाम
देह होईल मुक्तिधाम
राम अंतरी राहता!१

मृत्युभय सरते सरते 
तळमळही नुरते नुरते
राम आहे शांतवीता!२

"हवा राम, हवा राम"
म्हणुनि घोकू रामनाम
तोच गुंता सोडावीता!३

रचयिता : श्रीराम बाळकृष्ण आठवले 

गोंदवलेकर महाराज यांची प्रवचने मधील प्रवचन क्रमांक १३८ (१७ मे) वर आधारित काव्य.

सर्व परमात्माच करीत आहे असे मानले, म्हणजे काळजीचे कारण उरत नाही. परमेश्वराची इच्छा प्रमाण मानल्यावर सुखदुःख मानण्याचे कारण नाही. अशी भावना ठेवून वागावे की मी देवाचा आहे; तो माझा पाठीराखा आहे आणि म्हणून काही झाले तरी मला काळजी करण्याचे कारण नाही. हे सर्व नामस्मरण केल्याने साधते. म्हणून मी आज पासून सतत नामस्मरण करीत राहणार असा निश्चय करावा.