श्रीशिवाच्या मंदिरी, चित्त शांतीते वरी!

श्रीशिवाच्या मंदिरी, चित्त शांतीते वरी!ध्रु. 

शांत येथे वाटते, प्रेम कंठी दाटते 
देह हो जणु बासरी!१

मूर्ति नाही जरि इथे, दृश्य इथले भारते 
निमिषभर बस रे तरी!२

शोध आपण घ्यायचा, ध्यास आपण घ्यायचा
नांदतो शिव अंतरी!३ 

मिटुनि डोळे पाहणे, नाद‌विरहित ऐकणे 
नदी मिसळली सागरी!४

साध्य साधन एक ते साधका हे उमगते 
ना विसावा क्षणभरी!५

आदिनाथा हे गुरो, आदिसिद्धा सद्‌गुरो 
अंगुली धर तू करी!६

कोण मी हे जधि कळे, तिमिर सगळे लोपले 
ज्ञानरवि ये अंबरी!७

कामना कुठली नसो, भावना सरला असो
मन न रमते नश्वरी!८

रोग नाही अडसर, योग जुळतो सुंदर 
शक्ति ही किमया करी!९

सार ध्यानी आणले, श्रीमहेशे शिकवले 
बद्ध केले अक्षरी!१०

लेखणी ठेवू इथे, टेकवू माथा इथे
सफल शिवरात्री खरी!११

रचयिता : श्रीराम बाळकृष्ण आठवले
८/२/१९९६