उषादेवते ..

 
उषादेवते, तुजला वंदन!
जीवनात ये, तुला निमंत्रण !ध्रु. 

रवि उदयाचलि येऊ पाहे
मंद समीरण वाहत आहे
मनी जागतो श्री यदुनंदन !१

तुज भूपाळी गाता गाता
देहभान हे जाता जाता
गीता करते घरी पदार्पण !२

सर्वभाव ओतून आळवित
मिटल्या नयनी तेज साठवित
साधक करती प्रकाशपूजन !३

सत्संगे जागते चेतना
सत्कार्या लाभते प्रेरणा
चिंतनातुनी मिळे चिरंतन !४

रचयिता : श्रीराम बाळकृष्ण आठवले
२२.१०.१९८५

उषादेवते (ऑडिओ)