आई निघाली!

आईवेड्या लेकराची हाक वाया चालली 

हुंदके अन् आसवांची घेउनी श्रद्धांजली! 
आई निघाली! आई चालली! ध्रु. 

पोरका शिवाजी झाला 
छत्रहीन राजा झाला 
सांत्‍वनास शब्‍द न सुचती कुणा अशा काली! १ 

प्रेमास किनारे नव्‍हते 
ते होते अद्भुत नाते 
पक्‍व पान अलगद गळले दिशा ओस झाली! २ 

मृत्‍युपुढे हतबल सगळे 
इथे कुणाचे ना चाले 
कर्तव्‍यपूर्ति साधुनिया माय चालली! ३ 

अखेरचे दर्शन घेता 
उमाळा न ये आडविता 
दयासिंधु ऐसी आई निर्विकार झाली! ४ 

सोहळा सुखाचा सरला 
दु:खपूर धावत आला 
दु:खसागरी शिव बुडला, मातृशोक भाली! ५  

बालपणा सरला सरला 
राजधर्म केवळ उरला 
पोरका शिवाजी राजा मूक अश्रु ढाळी! ६ 

रचयिता : श्रीराम बाळकृष्‍ण आठवले