कशी करावी सद्गुरुराया मी अपुली पूजा?

कशी करावी सद्गुरुराया मी अपुली पूजा?ध्रु.

देही नसता कसले वर्णन?
म्हणुनी मौना वरिते भाषण
अनुभूती ते वर्णायासी शब्द न ये काजा!१

त्रिगुणातीता, देहातीता
सोऽहं भावा अगा अनंता
स्तवनासाठी गायन करिता स्वर कंपित माझा!२

उपचारांचे नाही कारण
स्वकर्मकुसुमे घडते पूजन
सोऽहं बोधी नित्य राहणे रुचते गुरुराजा!३

रचयिता : श्रीराम बाळकृष्ण आठवले
१७.११.१९७४

स्तुति काही न बोलणे 
पूजा काही न करणे 
सन्निधी काही न होणे 
तुझ्या ठायी 

ज्ञानेश्वरीतील या ओवीवर आणि स्वामी माधवनाथांच्या ज्ञानेश्वरी ज्ञानकिरणे या पुस्तकातील वरील ओवी वरच्या प्रवचन क्रमांक १६८ वर आधारित काव्य.