तुझा जन्म ज्ञाना सुफलित झाला!
मोगऱ्याचा वेलू नभावरि गेला ! ध्रु.
खेद मज वाटे तुझ्या विरहाचा
सखा गमावला जिवाचा भावाचा
मुखी हरिनाम परी अंतरात कळा ! १
ज्ञानमार्ग ज्ञाना तुवा दाविलासी
समाधीची वाट स्वये चाललासी
करूनि दाखवीला भोगांचा सोहळा ! २
आवतण दिले तुवा पांडुरंगा
इंद्रायणी आता ठरे चंद्रभागा
काय म्यां बोलावे गळा दाटलेला ! ३
सुखात वेदना वेदनेत सुख
कसे आकळले तुला आपसूक
तुझ्या सुखासाठी घोट दुःखाचा गिळला!४
म्हण नाम्या वेडा, म्हण तू भाबडा
माझ्या अंगणात प्राजक्ताचा सडा
आत्माराम माझा धाय मोकलला ! ५
रचयिता : श्रीराम बाळकृष्ण आठवले
No comments:
Post a Comment