तुकामाई ऐसे होते हो!

तुकामाई ऐसे होते हो! ध्रु

वर्ण केतकी, शरीर भरले
दिव्य तेज नेत्रांतरि वसले
फटकळ वाणी, हृदय कोवळे
प्रभुचिंतनि रतले हो!१

भक्तजनांची घेत परीक्षा
पारखल्याविण देत न दीक्षा
कसा लावती पूरी तितीक्षा
विरक्तिभास्कर होऽऽ २

आडरानी वा मळ्यात वसती
केव्हा बसती ओढ्याकाठी
डोई टोपडे, कटि लंगोटी
करि चिलिम रिकामी हो!३

योगाभ्यासी खंदे साधक
भक्तिपथावरि चालत भाविक
प्रसन्न मुद्रा भाषण मार्मिक
निःस्पृह, वत्सल होऽऽ ४

रचयिता : श्रीराम बाळकृष्‍ण आठवले
(गोंदवलेकर महाराज चरित्रावर आधारित काव्‍य)