निळोबा

 
तुझे नाम निरंतर गाऊ दे!
हा निळा तव पदी राहू दे!ध्रु.

धनवित्त नको श्रीहरि मजला
ते शहाणपणही नको मला
नामाची आतून आवड दे!१

हुरहूर लागली आतुरलो
दर्शनास देवा तळमळलो
अनुताप असा मज पोळू दे!२

ते रूप तुझे मग स्‍मरेन रे
ते नाम सदोदित गाइन रे
हरिरूपच नामे प्रकटू दे!३

स्वप्नात सद्‌गुरु पाठविले
प्रेमाने मजला नाम दिले
निशिदिनी नाम मज घोकू दे!४

जनीवनी सावळा निळा दिसे
द्रष्टा न कुणी वेगळा असे
तनमनधन चरणी वाहू दे!५

रचयिता : श्रीराम बाळकृष्‍ण आठवले