माझे मुखी राहो नाम करी एवढे श्रीराम!

माझे मुखी राहो नाम
करी एवढे श्रीराम!ध्रु.

नाम तुझे मज सुधा
शमवीते सारी क्षुधा
वाटे व्हावे मी निष्काम!१

उणे त्याची खंत नसो
ज्यास्त त्याचा गर्व नसो
मन व्हावे प्रेमधाम!२

जनां खायाला घालावे
डोळे भरुनी पहावे
दिसो जनी आत्माराम!३

रचयिता : श्रीराम बाळकृष्ण आठवले

गोंदवलेकर महाराज प्रवचन क्र. २११, २९ जुलै वर आधारित काव्य.

पुष्कळ मंडळी यावीत, आलेल्याला खायला घालावे, आणि

भगवंताचे नाम घ्यावे, या तीन गोष्टी मला फार आवडतात. त्या जो करील त्याच्या हयातीत त्याला कधीही कमी पडणार नाही. जो माझ्या स्मरणात प्रपंच करतो, त्याच्या प्रपंचात मी आहे. माझ्या माणसाने प्रपंचात हेळसांड केलेली मला आवडायची नाही. उलट, इतरांच्यापेक्षा त्याने जास्त दक्षता दाखवली पाहिजे. कमी आहे त्याची काळजी न करता, जास्त असेल तर त्याविषयी ममत्व न ठेवता, जो येईल तसा खर्च करतो, तो मनुष्य ते सर्व मला देतो.