शांकर धनु आज कसे भंग पावले?

श्रीराम जय राम जय जय राम !

कडाड कड् , कडाड कड् ध्वनी उमट‌ले 
शांकर धनु आज कसे भंग पावले?ध्रु.

राम नव्हे पौरुष हे पुढती ठाकले 
त्या अजेय शिवचापा सहज स्पर्शिले
प्रत्यंचा ज्या क्षणि ते लावु लागले!१

कडकडाट भयद असा पृथ्वि डळमळे 
सूर्यरथाचे वारू स्वैर उधळले 
श्रीरामे कठिण पणा सहज जिंकले!२

आशीर्वच मुनि देती, उधळली फुले 
दुंदुभिच्या तालावर पडति पाउले
आज धरा धन्य अशा नरवरामुळे!३

पंचारति ओवाळिति गीत गाउनी-
नाचतात नर्तकि ही धुंद होउनी-
संशय, अज्ञान, गर्व लुप्त जाहले!४

वरमाला सीतेने कंठि घातली-
कनकगौर बाला ती लाज लाजली
नयनांतुनि भावमधुर दृश्य तरळले!५

रचयिता : श्रीराम बाळकृष्ण आठवले
२१.०७.१९७३
खेमटा, तालगीत, लयबद्ध वाचन