श्रीराम जय राम जय जय राम !
विनविते तुम्हां रघुनाथा -
वनासी संगे न्या सीता!ध्रु.
थट्टा कसली भलत्या वेळी
नाथा आपण असे मांडली?
सुखदुःखांतरि सोबत माझी -
कशास नाकारिता!१
धर्म न्याय्य जे तेच सांगते
आज्ञा मज ही असे मानते
सन्निध असता स्वामी आपण -
भय न शिवे चित्ता!२
संगे असता नाथा आपण
पशू न बघतिल मजसी ढुंकुन
भय दाखविता, मला टाळता
कारण मुळि नसता!३
कंदमुळे आनंदे सेविन
पत्निधर्म मी अचूक पाळिन
विभिन्न देही एकच आत्मा
ध्यानि न का घेता?४
रचयिता: श्रीराम बाळकृष्ण आठवले
२५.०७.१९७३
जोगी, आधा
No comments:
Post a Comment