अनित्य विषयी उदास व्हा नित्य ईश्वरा स्मरा स्मरा!

नाम घेणाऱ्याचे राम कल्याण करतो हे माझे सांगणे शेवटपर्यंत विसरू नका

+++++++

अनित्य विषयी उदास व्हा
नित्य ईश्वरा स्मरा स्मरा! ध्रु.

भोगवासना खंडि साधना
अन्य कामना नको मना
मुखि रामाचे नाम धरा!१

बरवी शांती ती विश्रांती
संतोषच संतांची रीती
शांतिब्रह्मची मना करा!२

सच्ची तळमळ, गुरु भेटावा
विरक्ति उज्ज्वल ' काम ' जळावा
रामनामधर हरा स्मरा!३

रचयिता : श्रीराम बाळकृष्ण आठवले
गोंदवलेकर महाराज प्रवचन २०८, २६ जुलै वर आधारित काव्य. 

अनित्य जो विषय त्याच्या बाबतीत आपण उदास व्हावे आणि नित्य जो भगवंत त्याच्याकडे लक्ष द्यावे. नंतर, या जगातल्या किंवा स्वर्गातल्या भोगाची वासना नाहीशी करावी. हे दुसरे साधन होय. आपले मन बाह्य विषयांकडे धाव घेते; तिथून त्याला खेचून आणावे आणि भगवंताकडे लावावे.