हुंदके येतात कंठी!

हुंदके येतात कंठी, अश्रु गाली वाहती 
प्रथम तू अन् मृत्युही मग गाठ तोडी शेवटी 
बावरे माझी मती! १

तू दिलासी जो जिव्हाळा 
तो न कोठे लाभला 
एकटा मी तुजविना रे सांगु हे कोणाप्रती? २

दैन्य व्याधी अन् उपेक्षा 
या विना कसली अपेक्षा 
या त्रिशूले विद्ध केली त्यागमूर्ते आकृती! ३

भांडलो अन् तंडलो 
हासलो हेलावलो 
हट्ट ही जपले उराशी विसरु कैसा या स्मृती! ४

हातचा कर काढता तू 
भग्न झाला भावसेतू 
तू तिथे अन् मी इथे ना दो ध्रुवांची संगती! ५

रचयिता : श्रीराम बाळकृष्ण आठवले

(लोकमान्य टिळकांच्या चरित्रावर आधारित आगरकरांच्या निधनाच्या प्रसंगावरील काव्य)