भूपाळी हरिपाठाची

 हरिपाठा ये कंठी माझ्या, आस तुझी लागली! 
"हरि, हरि" म्हणतां हरिपाठा तव स्फुरली भूपाळी!ध्रु. 

"राम‌कृष्णहरि" जपे वैखरी मन निर्मळ बनले 
अरे मोहना मोहपाश मग तटा तटा तुटले 
हरिनामाचे पठण हीच रे गमली दिपवाळी!१ 

विषयि गुंतणे हा तर असतो स्वभाव गात्रांचा 
हरिपाठा तू मना उलटवी विनवित मी कधिचा 
समाधिसुख दे नामघोष नित, तू मज सांभाळी!२ 

हरिनामाविण दुजे न जगती तेच तेच रुचते 
सात्त्विक, सुंदर, अन्नब्रह्म ते पोषक बहु ठरते 
मौनावे तधि ज्ञानाईने माळ हृदी धरली!३ 

"पांडुरंग हरि, वासुदेव हरि" सहजच मी वदतां 
उच्चारणि या मोक्ष लाभला मोद न या परता 
काळ वेळ या नामा नाही तनु झाली मुरली!४ 

हरि पाहुणा मत्प्रिय व्हावा हरि गीती गावा 
सोऽहं चा स्वन मंजुळ काढी मम तनुचा पावा 
हरिविण वाया येरझार ही ज्ञानाई वदली!५ 

कळिकाळाला रीघच नाही हरि हरि म्हणतांना 
जन्म जाहला सफळ वाटतो मीपण सरताना 
अमृत लाजे अशी मधुरता हरिनामी भरली!६ 

आत्मसुखाची चटक लावसी, ऋण कैसे फिटणे
कर जोडुनियां "हरि, हरि" म्हणुनी नयनदले मिटणे 
श्रीरामासी बाळगुटी ही किति किति मानवली!७ 

रचयिता : श्रीराम बाळकृष्ण आठवले 
कार्तिक शु. १२, . २२-११-१९७७.