मन लागो राघवचरणी!

राम राम वदू दे वाणी 
मन लागो राघवचरणी!ध्रु. 

रामाचा धरता नेम 
नामात उतरते प्रेम 
माधुरी येतसे वचनी!१ 

नामाचा अनुभव घ्यावा 
सोऽहं स्वन कानी यावा 
घ्या दर्शन मिटल्या नयनी!२ 

जे माझे ते ते त्याचे 
ऐश्वर्य सर्व रामाचे 
मग मनपवनांची मिळणी!३

रचयिता : श्रीराम बाळकृष्ण आठवले
२३.०२.१९७९

गोंदवलेकर महाराज यांची प्रवचने मधील प्रवचन क्रमांक ५४ (२३ फेब्रुवारी) वर आधारित काव्य.

प्रत्येक शब्दात रामच आहे असे ज्यांना वाटते त्यांची तयारी काही निराळीच असते. प्रल्हादाने नामावर जसे प्रेम ठेवले तसे आपण ठेवावे. नाम घेऊन नामाचा अनुभव घ्यावा. विषयाचा घाला जेव्हा पडतो तेव्हा नामाची आठवण ठेवा. कोणालाही कोठेही खुपू नये. आपण हवेसे वाटावे. आपण निस्वार्थी झालो तरच हे साधेल. सत्कर्मानंतर आपली स्तुती ऐकायला साधकाने तेथे उभे सुद्धा राहू नये. माझे सर्व आहे ते त्याचेच आहे. त्याचे तो पाहून घेईल. तो जे करील ते सर्वांच्या हिताचेच करील. उद्याचा दिवस त्याच्या इच्छेनेच यायचा आहे. आपले मन मारा असे न सांगता आपले मन भगवंताकडे लावा असेच संत आपल्याला सांगतात. आपण भगवंतासाठीच नाम घ्यावे.