सुजन हो, सत्यच नारायण!

सत्याची व्याख्या कशी करणार? सत्य नारायण आहे, सत्य सनातन आहे, सत्य अजर आहे, अमर आहे! सत्य थोर नैतिक तत्त्व आहे. प्राणप्रणाने जपण्यासारखी वस्तू सत्यच आहे. श्रीसत्यनारायणाच्या पूजेच्या निमित्ताने सत्याचे व्रत घ्यायचे.
बिंदुने सिंधू बनून जायचे. तीर्थप्रसाद घ्यायचा. सत्य महिमा ऐकायचा. सत्याग्रही बनायचे. आळवून, आळवून गुणगुणायचे. 
++++++++

सत्यच नारायण 
सुजन हो, सत्यच नारायण!ध्रु. 

सत्य वदावे, सत्य श्रवावे 
सत्यवचन भजन!१ 

सत्य अबाधित, सत्य प्रकाशित 
सत्यदेव दर्शन!२

व्रत सत्याचे आज घ्यायचे 
या नच उद्यापन!३

प्रसाद घ्यावा, प्रसाद द्यावा 
करीत मधुभाषण!४

 
प्राणपणाने सत्या जपणे 
सार्थ तरी जनन!५ 

रचयिता : श्रीराम बाळकृष्ण आठवले 
(सुजनहो, सत्यच नारायण मधून)