देह जाणार जाणून, चित्ती राखा समाधान!

देह जाणार जाणून, चित्ती राखा समाधान!
धरा विश्वास रामाचा, करा राघवाचे ध्यान!१

लोभ नकोच देहाचा, छंद लागू दे नामाचा 
देवावर भार ज्याचा, तोच पार पोचायाचा!२ 

सख्य रामाशी करावे, दुःख तयाला सांगावे 
रामराय जेणे पावे, नामसाधन करावे!३

जे जे झाले होउनि गेले, येणारे ते येवो भले 
रामाहाती देती वल्हे, तेचि तरले तरले!४

रचयिता : श्रीराम बाळकृष्ण आठवले

गोंदवलेकर महाराज यांची प्रवचने मधील प्रवचन क्रमांक ६० (२९ फेब्रुवारी) वर आधारित काव्य.

चित्तात ज्याचे राहिले समाधान! तोच भगवंताचा आवडता जाण!
माझे हित रामाचे हाती हा धरिता विश्वास! समाधान मिळत असे जीवास!! 
देहाच्या लोभात न सापडावे!!
कर्तव्याची ठेवावी जागृति! त्यात भगवंताची राखावी स्मृति!! 
देहाचे अस्तित्व भगवंतासाठी! याहून नाही दुजी उच्च प्राप्ति!!
आता रामा एकच करी! तुझा विसर न पडो अंतरी!! आता जसे असेल तसे होऊ द्यावे! रघुनाथभजनी असावे!! मागील झाले होऊन गेले! पुढील येणार येऊ द्यावे भले!! कारणास्तव येणे झाले! आता काम संपले! आता न धरावा हव्यास! हेच वाटे जीवास! जे जे करणे आणिले मनी! रामकृपे पावलो जगी! आता माझे काही दुसरे मागणे नाही!!